Puma concolor

Puma concolor puma
Estáu de caltenimientu
Esmolición menor (IUCN 3.1)[1]
Clasificación científica
Reinu:	Animalia
Filu:	Chordata
Clas:	Mammalia
Orde:	Carnivora
Suborde:	Feliformia
Familia:	Felidae
Subfamilia:	Felinae
Xéneru:	Puma
Especie:	P. concolor Linnaeus, 1771
Distribución
Subespecies
Puma concolor anthonyi Puma concolor cabrerae Puma concolor concolor Puma concolor costaricensis Puma concolor couguar † Puma concolor puma
Sinonimia
Felis concolor
Consultes
[editar datos en Wikidata]

El puma^[2] (Puma concolor) ye un mamíferu carnívoru de la familia Felidae nativu d'América.

Esti gran felín vive en más llugares que cualesquier otru mamíferu xavaz terrestre del continente, yá que s'estiende dende'l Yukón, en Canadá, hasta'l sur de la cordal de los Andes y la Patagonia, Arxentina y Chile n'América del Sur. El puma ye adaptable y xeneralista, polo que s'atopa nos principales biomes de toa América. Ye'l segundu mayor félidu nel Nuevu Mundu, dempués del xaguar, y el cuartu más grande del mundu, xunto col lleopardu y dempués del tigre, el lleón y el xaguar. El so tamañu ye mayor que'l del lleopardu de les nieves, anque ta más emparentáu colos pequeños felinos, yá que, a diferencia de los grandes felinos del xéneru Panthera, que pueden ruxir, el puma ronronea como los felinos menores.

Como cazador y depredador d'emboscada, el puma escuerre una amplia variedá de preses. El so principal alimentu son los ungulaos como los venaos sobremanera na parte septentrional del so área de distribución, pero tamién caza camélidos como'l guanacu y especies tan pequeñes como inseutos y royedores. Prefier hábitats con vexetación trupa mientres les hores d'acesmo, pero puede vivir en zones abiertes.

El puma ye territorial y tien una baxa densidá de población. La estensión del so territoriu depende de la vexetación y de la bayura de preses. Anque ye un gran depredador, non siempres ye la especie dominante nel so área de distribución, como cuando compite con otros depredadores como'l xaguar. Trátase d'un felín solitariu que polo xeneral evita a les persones. Los ataques a seres humanos son raros, anque la so frecuencia aumentó nos últimos años.^[3]

El puma foi consideráu una fiera peligrosa a partir de la colonización europea d'América. Esta considerancia y la progresiva ocupación humana de los hábitats del puma fixeron que les sos poblaciones mengüen en casi tolos sos hábitats históricos. En particular, el puma foi escastáu na parte oriental d'América del Norte, con esceición del casu aislláu d'una subpoblación na Florida. Créese qu'esti felín podría recolonizar parte del so antiguu territoriu oriental. Cola so amplia distribución xeográfica, el puma tien decenes de nomes y ye mentáu con diverses referencies na mitoloxía de los pueblos aboríxenes d'América y tamién na cultura contemporánea.

1. ↑ Caso, A., López-González, C., Payan, E., Eizirik, E., de Oliveira, T., Leite-Pitman, R., Kelly, M., Valderrama, C. & Lucherini, M. (2008). «Puma concolor» (inglés). Llista Roxa d'especies amenazaes de la UICN 2010.4. Consultáu'l 21 de payares de 2010.
2. ↑ URL de la referencia: http://www.sabencia.net/nomenclator.php.
3. ↑ Error de cita: La etiqueta <ref> nun ye válida; nun se conseñó testu pa les referencies nomaes Med